Artel музлаткич ишлаб чиқаради

Ўзбекистонда “Артель” савдо маркаси остида маиший техника ишлаб чиқарувчи компания бу йил музлаткич ишлаб чиқариш технологиясини тўлиқ ўзлаштирмоқчи.

Айни дамда компания корхонасида ушбу маиший техникани йиғиш ишлари амалга оширилади, аммо августдан эътиборан бу ерда эҳтиёт қисмлар, узел ва агрегатларни ишлаб чиқаришни йўлга қўйиш режалаштирилган, бу эса ўз-ўзидан музлаткични Ўзбекистонда локализация қилиш имконини беради.

Шу йилдан эътиборан мамлакатимизда кир ювадиган машиналарнинг эҳтиёт қисмлари, узел ва корпуслари локализация қилинган эди. Бундан ташқари ишлаб чиқарувчининг режаларида “Артел” уяли телефонларининг моделларини кенгайтириш мақсадлари ҳам бор. Хусусан, CDMA стандартидаги уяли телефонлар ишлаб чиқаришни йўлга қўйиш режалаштирилган. Бунинг учун ҳозирда корхона конструкторлик бюросида ишланмалар олиб борилмоқда ва тахминан бир ойдан кейин ишлаб чиқариш йўлга қўйилади.

Таъкилаш жоизки, ҳозирги кунда «Артель» маркаси остида GSM стандартидаги 5 та уяли телефон модели бозорга олиб чиқилган. Яқин орада уларнинг орасига ушбу стандартдаги яна 2 та модел қўшилади.