Фарғона шаҳри марказида икки қаватли бино ёниб кетди

 

  

22 июнь куни тонгги соат 05:00да Фарғонада ичида «Александрия» ресторани, «Донар» кафеси, мебель ва оптика дўконлари бўлган икки қаватли бино ёниб кетди. Бу ҳақда Uzinform хабар бермоқда.
Енгил ўт олувчан пластик қопламадан келиб чиққан ёнғин тезда бутун ресторанни қамраб олган ва томгача кўтарилиб, томни амалда йўққа чиқарган.
«Ёнғин натижасида жабрланганлар йўқ. Ҳозирги вақтда 160 квадрат метр майдон, асосан, том ёниб кетган. Ёнғин сабабларини лаборатория текширувлари аниқлайди», – деди ёнғин инспекцияси вакиласи Орзигул Мирзаева.
Uzinform’нинг воқеа жойидан хабар беришича, бир вақтнинг ўзида иккинчи қаватдаги бир қатор иншоотлар ёниб кетган. Ёнғин вақтида уни фақат битта ўт ўчириш машинаси билан ўчиришга ҳаракат қилишган.
«Катта эҳтимол билан, ёнғинга эски электр симлар ёки электр асбоблардан нотўғри фойдаоаниш сабаб бўлган», – дейди исмини ошкор этмасликни сўраган ресторан официантларидан бири.
Uzinform’нинг алоҳида қайд этишича, воқеа жойида оломон тўпланмаган.

Ўзбекистон МХХ тожикистонлик чегарачиларни ноқонуний хатти-ҳаракатларда айблади

Сўнгги вақтларда Ўзбекистон-Тожикистон чегарасида давлат чегарасининг бузилиши ҳолатлари қайд этилган. Бу ҳақда, Ўзбекистон Миллий хавфсизлик хизмати Давлат чегараларини қўриқлаш қўмитаси матбуот хизматига асосланиб, 25 июнь куни Podrobno.Uz хабар тарқатди.
Жумладан, 7 июнь куни икки ов милтиғи билан қуролланган номаълум шахслар Ўзбекистоннинг Шут аҳоли пункти яқинида Тожикистон тарафдан давлат чегарасини кесиб этиб, қурол билан таҳдид қилиб, Ўзбекистон фуқаролари, уларга тегишли майда шохли молни ушлаб, Тожикистоннинг Фороб қишлоғи томонга ҳайдаб кетишган.
14-15 июнь кунилари соат 23:35дан 9:00гача Ўзбекистон чегарачилари томонидан 1 минг 475 дона молни ўтлатиш мақсадида қасддан Ўзбекистон давлат чегарасини бузиб ўтиб, мамлакат ичкариси томон бир километргача кириб борган беш нафар номаълум шахс қўлга олинган (ушбу воқеа қаерда содир бўлгани кўрсатилмаган).
Бундан ташқари, 23 июнь куни соат 05:50да Бахмал туманининг Тагапсой қишлоғи яқинида ўзбекистонлик чегарачилар томонидан Тожикистон фуқаролари ҳисобланган икки нафар чўпон қайд этилган. Улар Ўзбекистон ҳудудини ўз молларини ўтлатаётган бўлган. Қўлга олишга уриниш вақтида чўпонлар молни ташлаб, Тожикистон ҳудудида яширинишган.
24 июнь куни соат 01:00да худди ўша йўналиш бўйича ов милтиқлари билан қуролланган уч нафар номаълум шахс Ўзбекистон чегарасини бузиб ўтиб, мамлакат ичкариси томон 3-4 километргача кириб борган. Айни вақтда, улар мақсадли равишда Ўзбекистон фуқароси ҳисобланган уч нафар чўпонни қўлга олиб, уларга тегишли 1,5 минг бош майда шохли молни эгаллаб олишган ва жисмоний куч ишлатиш йўли билан уларни Тожикистон ҳудудига олиб ўтишга ҳаракат қилишган.
Чўпонлардан бири қоидабузарлар қўлидан қочиб чиқиб, ҳодиса ҳақида Миллий хавфсизлик хизмати Чегара қўшинлари ҳарбийларига маълум қилишга муваффақ бўлган. Кўрилган чора-тадбирлар натижасида эгаллаб олинган мол Ўзбекистон чегарачилари томондан қайтарилган. «Жиноятчилар эса Тожикистон ҳудудига яширинишга улгуришди, уларни 10га яқин тожикистонлик чегарачилар кутиб олгани Тожикистон Чегара қўшинлари ҳарбийларининг ноқонуний хатти-ҳаракатлари олдиндан режалаштирилганини кўрсатади», – дейилади Миллий хавфсизлик хизмати қўмитаси хабарида.
Хабарда қайд этилишича, Ўзбекистон қонунчилигига асосан қўлга олинган шахсларга нисбатан Ўзбекистон ҳуқуқни муҳофаза қилиш органлари томонидан тегишли чоралар кўрилмоқда. «Шунга қарамай, Ўзбекистон ва Тожикистон ўртасидаги конструктив муносабатларни сақлаб қолиш мақсадида, Бахмал ва Оҳангарон туманларида ушлаб қолинган мол тегишли тартибда Тожикистон тарафига топширилди», – дея қўшимча қилинган Ўзбекистон МХХ Давлат чегараларини қўриқлаш қўмитаси хабарида.

Manba: www.kun.uz

IKEA асосчиси 40 йил давомида солиқлардан қочиб яшади

87 ёшли IKEA компанияси асосчиси Ингвар Кампрад Швейцарияда ўтказилган 40 йил хаётидан кейин она ватани Швецияга қайтишга қарор қилди.

Бир пайтлар ватанини тарк этишга уни жуда баланд солиқлар мажбур қилган эди. Салкам ярим аср давомида бизнесмен етарлича маблағ йиғди ва энди уни давлат билан бўлишишга тайёр.

Миллиардер ватанига қайтишган рафиқаси Маргарета Стеннертнинг ўлимидан икки йил ўтгач қарор қилди. Энди у даромад солиғини тўлашга мажбур ҳисобланади. Бироқ у қочиб кетган "ҳашамат" солиғини тўлашига тўғри келмайди – ушбу солиқ 2007 йилда бекор қилинган.

IKEA компаниясидаги ўз улушини Кампрад ҳар эҳтимолга қарши ҳорижда рўйҳатга олинган ҳайрия ташкилотлари ҳисобига ўтказиб қўйган. Кампрад Швецияни 1970 йилларнинг бошида тарк этган эди. У билан бирга шу йил мамлакатни яна бир скандинавиялик миллиарлер Tetra Pak компанияси асосчиси Ханс Раузинг ҳам тарк этган.  Кампраддан фарқли ўлароқ АҚШда яшаётган бу бизнесмен ватанига қайтмоқчи эмас.

IKEA компанияси дунё бўйича мебель ва уй жиҳозлари сотиш билан шуғулланадиган йирик магазинлар тармоғига эга компания ҳисобланади. Унга 1943 йилда асос солинган. Айни дамда унинг "отаси" 52 миллион долларга эга. 

 

Manba: www.darakchi.uz

Ўзбекистонда “Ҳизб ун нусрат” диний-эктремистик ташкилоти аъзоларидан бири фош этилди

 

Виждон эркинлиги мамлакатимиз қонунчилигида ҳар бир фуқаро учун кафолатланган. Бош Қомусимизда ҳар бир фуқаро жинси, тили, дини, миллати, ижтимоий келиб чиқиши ва мавқеидан қатъи назар қонун олдида тенг экани кўрсатиб ўтилган.

Бугунги кунда юртимизда 135 миллат ва элат, бир қатор диний конфессиялар вакиллари истиқомат қилади. Ислом, насронийлик диннинг деярли барча йўналишлари, шунингдек, буддавийлик, баҳоийлик, яҳудийлик, кришнавийлик  ва бошқа диний таълимотга эътиқод қилувчиларнинг барча диний арконларни адо этишлари учун шарт-шароит ва имкониятлар яратиб берилган.

Бироқ, бу борадаги диний бағрикенгликдан ва эътиқод эркинлигидан айрим диний-экстремистик оқимларнинг ғаразли мақсадларда, жумладан ўз зарарли ғояларини омма орасида  кенг тарғиб этиш ва шу орқали улар устидан ҳукмронлик ўрнатиш, ўз йўл-йўриқларига юргизишга интилиш ҳоллари учраб турибди.

Хусусан, “Хизб ут таҳрир”, “Хизб ун нусрат” ва “Жиҳодийлик” каби диний-экстремистик ташкилотлар тарафдорлари диний таълим ниқоби остида мустақил давлатимиз фуқароларини ақидапарастлик ғояларга эргаштиришга уринмоқдалар. Масалан, “Ҳизб ун нусрат” диний-эктремистик ташкилоти сафидаги ноқонуний хатти-ҳаракатлари учун 2012 йил декабрь ойида тўққиз йил муддатга озодликдан маҳрум этилган Маҳмудхўжа Аҳмаджоновнинг турмуш ўртоғи Лола Аҳмаджонова эрининг кўрсатмалари асосида атрофига тақводор аёлларни тўплаб, улар ўртасида ноқонуний диний тарғибот  ишларини олиб борган.

Дастлабки босқичда уларга ислом динининг асосий арконлари ва араб алифбосидан сабоқ берилган. Кейинги босқичда эса, “муаллима”лар “Хизб ут тахрир” ва “Хизб ун нусрат” диний оқимлари ғояларини “илми толиб”ларга сингдиришга ҳаракат қилишган. Натижада бир неча йил ичида пойтахтлик ўнлаб ёш хотин-қизларнинг онгу шуурини заҳарлашга эришган.

Эътиборлиси шундаки, Аҳмаджонова ўз машғулотлари учун харажатларни иштирокчиларнинг ўзидан ундириб келган. Фақат дастлабки ой сабоқлар бепул ўтилган. Кейинги ойларда эса, “шогирдлар” ё Аҳмаджоновларнинг шаҳар ташқарисидаги томорқасида бепул ишлаб беришлари, ё ойида 50-100 минг сўм миқдорида пул тўлашлари керак бўлган.

Шу ҳолатнинг ўзиёқ мазкур ташкилот бир неча йиллардан буён ғаразли ва тубан мақсадларга асосланган ҳолда фаолият юритиб келаётганини исботлайди.

 

Руҳий таъсир ўтказиш орқали ўз мустақил фикрлаш қобилиятидан маҳрум бўлган тингловчилар ўз-ўзидан Лоланинг барча кўрсатмаларини сўзсиз бажарадиган бўлишган. Унинг ўқув машғулотлари иштирокчилари, аёллар ва вояга етмаган қизларга ҳижобга кириш мажбурий этиб белгиланган, улар учун мактабга қатнаш, кўнгилочар дастурларни томоша қилиш, туғилган кунларни ўтказиш, ҳайитдан бошқа байрамларни нишонлаш тақиқланган. Энг даҳшатлиси, уларнинг барчасига террорга мойиллик, динсиз ва бошқа динларга эътиқод қилувчиларга нисбатан чексиз нафрат ғоялари пухта сингдирилган.

Бироқ, Лола ва унинг назорати остида бўлган гуруҳларнинг фаолияти ҳуқуқ-тартибот идоралари томонидан фош этилди ва айни пайтда бу гуруҳларнинг ҳар бири устидан алоҳида тергов ҳаракатлари олиб борилмоқда.

 

Шундай экан, азиз ватандошлар, огоҳ бўлайлик! “Тақводор” инсонларнинг даъватлари зимиридаги ғаразли мақсадларни англаб етмай туриб, уларга осонгина алданиб қолмаслик, шу каби диний-экстремистик оқимлар фитнасига тез ва осон учмаслик учун ҳушёрлик ва эҳтиёткорликни қўлдан бермайлик.

Суҳроб Насимов

 

Manba: www.darakchi.uz

Ўзбек журналистикаси факт ва рақамларда

27 июнь – Матбуот ва ОАВ ходимлари куни. Касб байрамимиз арафасида, мамлакатимиз журналистикаси тарихи билан боғлиқ, бир қанча факт ва рақамларга мурожаат қилмоқчимиз.

Ўзбек тилидаги илк миллий газета

2013 йил 1 январ ҳолатига кўра, юртимизда 712 та газета ва 275 та журнал рўйхатдан ўтган. Илк ўзбек миллий газетасига эса, жадидчилик ҳаракатининг таниқли вакилларидан бири Исмоил Обидий томонидан асос солинган. 1906 йилнинг 27 июнь куни “Тараққий” газетасининг илк сони дунё юзини кўрган эди. Айни пайт ушбу кун мамлакатимизда Матбуот ва оммавий ахборот воситалари ходимлари куни сифатида нишонлаб келинмоқда.

Бугунги кунга қадар тўхтовсиз фаолият юритиб келаётган энг ёши улуғ нашр эса  “Зарафшон” газетаси (ҳозирда Самарқанд вилояти ҳокимлиги нашри) ҳисобланади. Бу газета шу йили ўзининг 100 йиллигини нишонлади.  “Зарафшон” 1913 йил 15 апрелида Маҳмудхўжа Беҳбудийнинг масъул муҳаррирлиги остида чиқа бошлаган.

Илк мустақил нашрлардан бири эса “Даракчи” газетасининг рус тилидаги нашри ҳисобланади (1996 йил 15 май).   

Ўзбекистон  ахборот агентликлари

Бугунги кунда мамлакатимизда 4 та ахборот агентлиги фаолият юритмоқда. Жумаладан, Ўзбекистон Миллий ахборот агентлиги давлатимизнинг  расмий ахборот манбаи ва мамлакатдаги етакчи ахборот агентлигидир. Унинг фаолияти 1918 йили Тошкентда РосТА (Россия телеграф агентлиги) бўлими очилганидан бошланади. Кейинчалик у ТАСС тизимидаги ЎзТАГ – Республика Телеграф Ахборот агентлигига айлантирилди. 1992 йил 5 февраль кунидан эътиборан агентлик Ўзбекистон Миллий ахборот агентлиги (ЎзА) сифатида қайта ташкил этилди. Айни пайтда ЎзА ўзбек, рус, инглиз, француз, немис, испан, араб ва хитой тилларида жаҳон бўйлаб ахборот тарқатмоқда.

Биринчи нодавлат ахборот агентлиги эса “Туркистон-пресс” ҳисобланади. У 1998 йил ташкил топган.

Юртимизда веб сайтлар ҳам ОАВ сифатида рўйхатга олинмоқда, жумладан 2013 йил 1 январь ҳолатига кўра 220та интернет сайтлари рўйхатга олинган. 

Ўзбекистондаги илк радио

Ўзбекистонда илк радиоэшитришлар тажрибалари 1926 йилда Тошкентда амалга оширилган. 1927 йил 11 февралда қуввати 2 кВт бўлган оммавий радиостанция ишга туширилиб, мунтазам радиоэшиттиришлар бошланган. Бугунги кунда юртимизда 34 та радиоканал фаолият юритмоқда.

Ўзбекистондаги илк ТВ

Тошкент ОАВ тарихида телевидение ватани сифатида эътироф этилади. Тошкентлик олимлар Б.Грабовский ва И.Белявскийлар илк бор ҳаракатдаги тавсирни масофага узатиш имконини берувчи қурилмани яратишган. Ўзбекистонда телекўрсатувларни расмий равишда эфирга узатиш 1956 йил 5 ноябрдан бошланган. Худди шу пайтда Тошкент телевидение студияси ташкил этилган. Юртимиздаги илк нодавлат телеканал сифатида эса СТВ – Самарқанд телерадикомпанияси рўйхатга олинган. Бу телеканал ўз фаолиятини юртимиз мустақилликка эришишидан олдин, 1991 йил март ойида Самарқанд шаҳрида ўтказилган Наврўз тантаналари ҳақидаги хабарни эфирга узатишдан бошлаган. Бунги кунга қадар юртимизда 60дан зиёд телеканал фаолият олиб бормоқда.

 

Manba: www.darakchi.uz

Тест янгиликлари: Энди жавоблар варақасида фанлар блокларга ажратилмайди

Юртимизда ҳозир абитуриентлар учун қизғин палла. Минглаб, йўқ, юз минглаб абитуриентлар талаба бўлиш истагида 70 та олий таълим муассасаларига (филиаллар билан) ҳужжатларини топшириб, 1 август куни бўладиган тест жараёнларига тайёргарлик кўришмоқда.

Блогимда имкон қадар қабул жараёнлари билан боғлиқ маълумотларни бериб боришга ҳаракат қиляпман. Бугун тест жараёнлари билан боғлиқ бир ўзгартириш ҳақида айтиб ўтмоқчиман.

Хабарингиз бор, ОТМларга кириш тестлари 3 та фан блоки бўйича ўтказилади. Ижодий имтиҳон мавжуд бўлган ОТМларда эса 2 та фан блоки. Саволлар китобида ҳар бир фан бўйича 36 та савол ўрин олган бўлиб, мос равишда жавоблар варақасида ўша фанларнинг жавоби бўяладиган ҳудудлар ҳам 3 та блокка ажратилган бўлар эди.

ўп йиллик амалиётда шундай кўнгилсиз ҳоллар учраб турар эдики, унда баъзи абитуриентлар балки ҳаяжондан, балки қўрқувдан, балки шошгандан, балки тушунмаганлиги сабабли жавобларни бўяш вақтида фан блокларининг ўрнини алмаштириб қўяр эди. Масалан, кимдир “Она-тили ва адабиёти” фани блокига “Математика”ни бўяб қўярди. Бундайин “ўрин алмашиш” охир-оқибат якунда абитуриентга жуда ва жуда қимматга тушар эди. Тасаввур қилинг, абитуриент минг қийинчилик билан тест саволларига жавобларни белгилаб чиқди. Ҳаммаси жойида, кўп саволларга тўғри жавоб берганига ишониб турибди. Аммо жавобларни бўяш вақти келганда, нимадир бўларди-ю, эҳтиётсизлик билан блоклар ўрнини алмаштириб қўяди. Тамом! Агар ўша абитуриент ўта ва ўта омадли бўлмаса, унда 1 йиллик умри аниқ куйди дегани эди.

Мазкур йилдан бошлаб, ушбу тушунмовчиликни олдини олиш мақсадида Давлат тест маркази жавоб варақаларига кичик ўзгартириш киритишга қарор қилди. Энди жавоб варақаларида фанлар блокларга ажратилмайди. Бу қандай бўлади?

Масалан, тасаввур қилинг, абитуриент 3та фан блоки бўйича тест топширади:

1. Тарих;

2. Она тили ва адабиёти;

3. Инглиз тили.

Саволлар китобида дастлаб “Тарих” блоки саволлари келди дейлик. 1 дан 36 гача. Кейинги блокдаги “Она тили ва адабиёти” фанидан саволларнинг тартиб рақами яна янгитдан 1 дан эмас, балки 37 дан бошланади, токи 72 гача. Учинчи блокдаги “Инглиз тили” фанидан саволларнинг тартиб рақами мос равишда 73 дан бошланиб, 108 гача давом этади.

Худди шунингдек, жавоблар варақасида ҳам бўяш учун ажратиладиган катаклар 1 дан 108 гача рақамланиб, фан номлари ва блоклар каби жойлар олиб ташланади. Ана шунда, абитуриентлар фанлар блокини жойини алмаштириб қўйиш каби муаммоларга дуч келишмайди.

Фақатгина битта вазиятда фан номи келтирилади, бу ҳам бўлса “Чет тили” блокида абитуриент қайси чет тилини танлашини (инглиз тили, немис тили, француз тили) кўрсатиб ўтади.

Эслатиб ўтаман, абитуриентларга тест топшириқларини бажариш учун қуйидаги вақт меъёрлари белгиланади: 
72 саволга - 2 соат;
108 саволга - 3 соат.

Ҳар бир тест саволига фақат битта жавоб белгиланиши шарт. Агар жавоблар варақасидаги “Белгилаш учун намуна” қоидасига риоя этилмаса, жумладан битта саволга жавоблар варақасида тегишли доирача бўялмаса ёки икки ва ундан ортиқ доирача бўялса ёхуд тўлиқ бўялмаса ушбу жавобга балл берилмайди.

Тўлдирилган жавоблар варақаси абитуриентнинг билим даражасини белгиловчи асосий ҳужжат ҳисобланади.

Ҳужжатларни топшириш жорий йилнинг 20 июнидан бошланган бўлиб, 20 июлига қадар давом этади.


Manba: http://xushnudbek.blogspot.com

Расман. Ўзбекистонда 5000 сўмлик пул банкнотлари муомалага чиқарилади

Ўзбекистон Республикаси Марказий банки қиймати 5000 сўм бўлган пул билетларини муомалага чиқариш тўғрисида расман ахборот берди.  Унга кўра, 2013 йилнинг 1 июлидан бошлаб Ўзбекистон Республикаси Марказий банки қиймати 5000 сўм бўлган янги пул билетларини муомалага чиқаради.

Ўзбекистон Республикаси Марказий банкининг қиймати 5000 сўм бўлган пул билетлари 144 х 78 мм. ўлчамдаги ҳимояланган қоғозда тайёрланган. Банкнотнинг ўнг тарафидаги кенг оқ рангли сатҳда Ўзбекистон Республикаси Герби ва “5000” рақами кўринишида сув белгиси мавжуд. Оқ рангли сатҳнинг чап тарафидан қоғоз қатламида голографик эффектли юзага чиқиб, ичкарига ботувчи ҳимоя ипи ўтказилган. 

 

Билет олд томонининг юқори қисмида “O’ZBEKISTON RESPUBLIKASI MARKAZIY BANKI” ёзуви мавжуд. Чап қисмида нақшинкор элементлар фонида Ўзбекистон Республикаси Герби тасвирланган. Гербнинг пастки қисмида еттита рақамли номери билан икки лотин ҳарфидан иборат серияси жойлашган. Нақшинкор рамканинг ўнг ва чап бурчакларининг қуйи қисмида, шунингдек Гербнинг ўнг тарафида “5000” рақами тасвирланган бўлиб, билетнинг қийматини билдиради. Гербнинг ўнг тарафидаги “5000” рақами устига йирик ҳарфлар билан “SO’M” сўзи ёзилган. Ушбу тасвир тепасида билет қиймати сўз билан “BESH MING” кўрсатилган. Нақшинкор рамканинг пастки қисмида “O’ZBEKISTON SO’MI RESPUBLIKA HUDUDIDA HAMMA TO’LOVLAR UCHUN O’Z QIYMATI BO’YICHA QABUL QILINISHI SHART” ёзуви жойлашган. Банкнотнинг жигар ранг нақшинкор рамкаси, “O’ZBEKISTON RESPUBLIKASI MARKAZIY BANKI” ёзуви, Герб, ўнг ва чап томондаги  “5000” рақамлари бўртиб туради, ушлаб кўрилганда сезилади. Оқ рангли сатҳда жойлашган “5000” рақами унинг диагонали бўйича фарқланган икки хил рангда ишланган. Рақам тепасида билетнинг номери ва серияси такрор кўрсатилган. Оқ рангли сатҳнинг юқори қисмида қиялик бурчагининг ҳолатига қараб рангини бронза рангидан яшил рангга ўзгартирувчи ва ушлаб кўрилганда билинадиган бўртиб турувчи нақш мавжуд. Нақш тепасида банкнот чиқарилган йил “2013” кўрсатилган.

 

Банкнотнинг орқа томони чап қисмидаги оқ рангли сатҳда сув белгилари кўринади. Оқ рангдаги сатҳнинг юқори ва пастки қисмларида рангли нақшинкор безаклар жойлашган бўлиб, пастки безак устида “5000” рақами акс эттирилган. Банкнотнинг марказида “OLIY MAJLIS” меъморий биноси, бино гумбазининг тепасида Ўзбекистон Республикасининг рангли байроғи тасвирланган. Расмнинг юқори чап бурчагида бир-бирини кесиб ўтувчи “5000” ва “SO’M” ёзувлари мавжуд бўлиб, уларнинг тепасида банкнотнинг қиймати сўз билан “BESH MING” кўрсатилган. Уларнинг пастки қисмида турли баландликдаги, қиялик бурчагининг ҳолатига қараб рангини ёрқин тилла рангдан оч яшил рангга ўзгартирувчи иккита “5000” рақамлари жойлашган.

Шунингдек, банкнотнинг “5000” рақамдаги қиймати унинг юқори ўнг бурчагида ҳам тасвирланган. Пастки қисмида “O’ZBEKISTON SO’MINI QALBAKILASHTIRISH QONUNGA MUVOFIQ TAQIB QILINADI” ёзуви жойлашган. Муомалага чиқарилаётган қиймати 5000 сўм бўлган пул билетлари, айни пайтда муомалада бўлган пул белгилари ва тангалар билан бир қаторда, барча хўжалик юритувчи субъектлар ва аҳоли томонидан ўз қиймати бўйича барча турдаги тўловлар учун ҳеч қандай чекловларсиз қабул қилиниши шарт.

Эслатиб ўтмиз, 5000 сўмлик купюранинг муомалага чиқарилиши ҳақида интернетда анча аввал хабарлар пайдо бўлган, бироқ Марказий банк матбуот хизмати бу хабарларни тасдиқлашдан бош тортганди.

 

 Mанба: www.darakchi.uz

Ўзбекистон Президенти Украинага ташриф буюради

Ўзбекистон Республикаси Президенти Ислом Каримов яқин кунларда Украина Республикасига ташриф буюради. Бу ҳақда Украина Олий Радаси (парламент) раиси Владимир Рибак Ўзбекистоннинг Украинадаги Фавқулодда ва Мухтор элчиси Алишер Абдуалиев билан бўлиб ўтган суҳбат чоғида малум қилган.

Ўзаро суҳбат чоғида парламент раҳбари  Украина томони Ўзбекистон Республикаси Президентининг кутилаётган ташрифига алоҳида эътибор қаратаётганини таъкидлади. "Мазкур ташриф Украина - Ўзбекистон ҳамкорлигини жадаллаштиришда муҳим омил бўлиб хизмат қилади", — дейди Рибак.

Томонлар шунингдек, иккитомонлама ҳамкорлик алоқалари, жумладан, парламентлараро, савдо-иқтисодий алоқаларни фаоллаштириш юзасидан ўзаро фикр алмашдилар. Владимир Рибак Украинанинг Ўзбекистон билан муносабатларни жадалаштириш тарафдори эканини қайд этар экан, энг аввало ўзаро масалаларни муҳокама этиш имкониятини берувчи олий даражадаги учрашувларни мунтазам равишда ўтказиб туриш кераклигини таъкидлаб ўтди. 

manba: www.darakchi.uz