Ziyonet тармоғи маълумотларига кўра, Ҳотам Файзиев 1937 йил Тошкент шаҳрида туғилган. 1958 йили Бутуниттифоқ Давлат кинематография институтининг (ВГИК, Москва) кинооператорлик факультетини, 1983 йилда Тошкент театр ва рассомлик санъати институтининг драма режиссёри бўлимини тугатган.
Ҳотам Файзиев 1958-1959 йилларда «Ўзбекфильм киностудиясида оператор ассистенти, 1959 йилдан эса кинооператор сифатида ишлади. У ўзбек киноси тарихида ўчмас из қолдирган «Сен етим эмассан» (1962), «Тошкент – нон шаҳри» (1967), «Фавқулодда комиссар» (1969), «Абу Райҳон Беруний» (1974), «Дилором» (1968), «Ўткан кунлар» (1998) каби бадиий фильмларда операторлик қилди.
Сўнгги 40 йил ичида Ўзбекистонда суратга олинган юзлаб ҳужжатли ва қисқа метражли фильмларни майдонга келишида ҳам Ҳотам Файзиевнинг хизматлари каттадир. 1960—1998 йиллар мобайнида Ҳотам Файзиев суратга олган кўпгина бадиий ва ҳужжатли фильмлар Кишинёв, Санкт-Петербург, Тбилиси, Баку, Олмаота, Теҳрон, Бухоро ва бошқа шаҳарларда бўлган фестивалларда совринларга сазовор бўлди.
Ҳотам Файзиев кинорежиссёр сифатида ҳам ўзини кўрсатиб, 1988 йилда «Оқ бино оқшомлари», 2007 йилда «Кичкина одамлар», 2011 йилда «Ёзсиз йил» фильмларини суратга олган.
Ҳотам Файзиевнинг ўзбек кино санъатининг салкам ярим асрлик равнақидаги хизматлари муносиб тақдирланди. 1969 йилда «Ўзбекистонда хизмат кўрсатган санъат арбоби» унвонига, 1970 йилда Республика Давлат мукофотига сазовор бўлди, Ўзбекистон Республи-каси мустақиллигининг саккиз йиллиги муносабати билан «Эл-юрт ҳурмати» ордени билан мукофотланди.
Комментариев нет:
Отправить комментарий